آه ائیلدییم نشئیی-قلیانین اۆچوندور،
قان آغلادیغیم قهوئیی-فؽنجانین اۆچوندور؛
وضع ائیلدییم هدیه و احساندان آنجاق
عمده غرضیم کیسه و همیانین اۆچوندور؛
سرکشتلییم خیرمنی-بوغدالار اوجوندان،
آشیفتلییم ثروت و سامانین اۆچوندور؛
فرش ائیلدییم سینهمی هر گۆن قدمینده،--
کسکین طمعیم سۆفرهدهکی نانین اۆچوندور؛
بیمار تنیم کۆفته و بوزباش علمیندن،
خونین جییریم دولما-بادیمجانین اۆچوندور؛
آغزیم دولوسو نعمتی-فیردووس دئدیکده،--
بوشقابدا قارا گؤزلو فیسینجانین اۆچوندور؛
وصف ائیلدییم ذوقله انهاری-بئهیشتی،--
کوثر مزهلی شربتی-ریحانین اۆچوندور؛
گؤردوم کی، پلوو بیشمهدهدیر، آجلیغا دؤزدوم،
بیلدیم بو تداروک شبی-احسانین اۆچوندور.
آخ، بیرجه گؤریدیم سنی، ائی سئوگیلی واریث،
مئیلیم سن ایله دستی-زرفشانین اۆچوندور!
منعملره جان وئر، کؤنول، اویما فۆقرایه،
سینمده سنی بسلدییم آنین اۆچوندور.
آهین شرری ائتمز اثر بیر کسه، هوپ-هوپ،
بو اود سنین آنجاق آلیشان جانین اۆچوندور....
یان، دینمه، سن الله!
قان، دینمه، سن الله!
حق سؤیلمیش اولسان،
دان، دینمه، سن الله!