اول گۆن کی سنه خالیق ائدر لۆطف بیر اؤولاد،
اولسون اۆریین شاد!
تعیین ائله جینداری کی، ائتسین اونا ایمداد،
تا دگمهیه همزاد؛
ساغدان سولا، سولدان ساغا سال بوینونا هئیکل،
قوی جیننی معطّل؛
مین گۆنه طیلیسماته توتوب ائیله مۆقفّل،
گزدیر اونو ال-ال؛
گر دگسه سوووق، سانجیلانیب اولسا دا بیمار،
حؤکم ائت گله جیندار؛
گؤسترمه طبیبه او جیرگوشهنی زینهار،
قویما اولا موردار؛
آغلارسا اوشاق دردینین آختارما دواسین،
آنجاق سؤی آناسین؛
قورخوزسون او دا دامداباجا ایله چاغاسین،
کسسین ده صداسین؛
اؤرگت اونا، البته، اؤزون بیر نئچه مؤوهوم،
محدود اولا معصوم؛
بو سایهده عؤمر ائیلهیه دۆنیاده او مظلوم،
هر حالتی مذموم؛
تک-تک دیل آچاندا اونا تعلیم ائله حدیان،
هم اولما پئشیمان؛
بیلدیر اونا مین دۆرلو قباحتلری هر آن،
آلسین اله عۆنوان؛
اون یاشا یئتینجه اوشاغین ائیلهمه غفلت،
قاندیر نئجه بیدعت؛
تا اون بئشه یئتدیکجه تاپا ایشده مهارت،
هم ائیلهیه عادت؛
گؤندرمه اونو مکتبه، دنگ ائیلهمه باشین،
تؤکمه اۆزه یاشین؛
هر فند و بیجلیکده ائدر کسب معاشین،
ساخلار اؤزو باشین؛
راحت نهیه لازیم ائده دۆنیاده معیشت،
قولدورچولوق اؤرگت؛
تا اینکی قومار اوینایا، قتل ائیلهیه، غارت،
خوشدور بئله صنعت؛
دۆنیانی سویوب، ائیلهیه هر گۆن سنی خۆرسند،
ساغ اول، بئله فرزند!
ائوده تاپیلیر ایمدی دخی چای، پلوو، قند،
کیمدیر سنه مانند؟
ناگه آلینیب حبسه، دوتارسا سنی وحشت،
وئر حاکیمه رۆشوت؛
سات وار-یوخونو، آدووقاتا وئر نئچه خلعت،
پوچ اول هله-هلبت؛
آخیردا اولوب حسرتی-دیداری-جمالی،
قال کیسهسی خالی؛
قالدیقدا اوغولسوز دخی تئز باشلا سوالی،
آل ویزر و وبالی؛
تاپ ریزقی-حلالی،
آی باشی بلالی،
یؽغ دیمیشی، کالی،
اولماز اوخوماقدان
تاپماق بو جلالی!..
اؽلک دفعه «مولّا نصرالدّین» ژورنالیندا (26 مای، ۱۹۰۶، № 8) «هوپ-هوپ» ایمضاسی ایله چاپ اولونموشدور.