بیلمم نه گؤروبدور بیزیم اوغلان اوخوماقدان؟!
دنگ اولدو قولاغیم!
ژورنال، قزئته، هرزه و هدیاد اوخوماقدان
اؽنجلدی اوشاغیم!
عقلین آپاریب بس کی، باخیر گۆنده قرایه،
یا رب، نه حماقت!
سؤز ائتمز اثر، چاره قالیب ایمدی دوعایه،
تدبیر ائله، عؤورت!
لعنت سنه، عیفریته، سنیندیر بو جهالت،
ائتدین نه خیانت!
سندن تؤرنیبدیر بیزیم ائوده بئله بیدعت،
ائی مایهیی-حیلت!
دوتسون چؤرگیم گؤزلرینین آغ و قاراسین،
ائی همسری-بدخواه!
حاشا، اودا یاخماز آنا ایستکلی بالاسین،
کسسین سنی الله!
بو طیفلی اوغوتماقلیغا ائتدین منی ترغیب،
هپ ائیلهدین ایغوا.
اؽمدی ندی فیکرین؟ ایشیمیز اولدو بو ترکیب،
یوخ چارهسی اصلا.
هئیهات کی، تدبیر اولا بو خانهخرابه،
زایل اولوب عقلی.
درسه، قزئته، مکتبه، ژورنالا، کیتابه
مایل اولوب عقلی.
یؽخدین ائویمی، ائیلهدین اؤولادیمی ضایع،
اؽش کئچدی محلدن.
من آنلامیرام علم ندیر، یا کی، صنایع،
زارم بو عملدن!
ایستردیم او دا من کیمی بیر حؤرمته چاتسین،
دۆنیاده دولانسین؛
تا قول گۆجونه مالیک اولوب شؤهرته چاتسین،
آزاده دولانسین؛
بیر وقتیدیر ایمدی کی، اولوب رۆستمی-دؤران،
بیر آد قازانایدی؛
غارتلر ائدیب تا کی، تاپایدی سر و سامان،
بیر شئی ده قانایدی.
پوچ ائیلهدین، عؤورت، بو گؤزل، ساده جوانی!
دیلبیلمز اوغول، وای!
رنگی سارالیب، قالماییب اصلا یاری جانی،
بیر گۆلمز اوغول، وای!
آخ، ناخلف اوغلوم، نه چتین مشقه دۆشوبسن،
ائی کاش، اوسانایدین!
قولدورلوغا یوخ، علمه طرف عشقه دۆشوبسن،
بو قۆبحو قانایدین!
ائی نوری-دۆچئشمیم، اوخوماقدان حذر ائیله،
صالح ولد اول، گل!
آت مین، هۆنر اؤیرش، منی ده بختور ائیله،
اؽشده بلد اول، گل!
بسدیر اوخودون، آز قالا جانین تلف اولدو،
بو کاردن ال چک!
یازماق، اوخوماق باشینا انگل-کلف اولدو،
اشعاردن ال چک!
مین علم اوخویوب سؤز بیلهسن، حؤرمتین اولماز
بو داری-جهاندا؛
سؤز بحرینه گؤهر اولاسان، قیمتین اولماز،
خاصه بو زماندا.
یوخ، یوخ، باخیرام فیکرینه، سندن اوغول اولماز،
جانین بهجهنّم!
مؽرت مؽرت اوخوماقدان، کیشی، بیر قان کی، پول اولماز!
مؽرتیلدا دمادم،
قؽل علم فراهم،
اول غۆصّهیه همدم؛
عؤمرون اولاجاق کم،
دۆشمن سنه عالم!...
اؽلک دفعه «مولّا نصرالدّین» ژورنالیندا (16 ایون، ۱۹۰۶، № 11) «هوپ-هوپ» ایمضاسی ایله چاپ اولونموشدور.