اوخوردو مرثیهخوان، من باخیردیم حئیرتله،
ووروردو باشه جماعت، کمال-شیدّتله.
رفیق قووزادی باشین، دئدی: اییل آشاغی!
دئدیم: نیه؟ دئدی: همرنگ اول جماعتله.
روا دئییل باخاسان خاریجی کیمی خلقه،
گرک ملول اولاسان سن ده بو مۆصیبتله.
خۆلاصه، مرثیه بیتدی، چکیلدی "یا الله!"
گؤتوردوک ال طرف-کیبریایه میلّتله.
دؤشندی سۆفره یئره، خونچهی-پیلوو گلدی،
قارینلار اولدو چؽراغان او دادلی نعمتله.
یانیردی پینج او مجلیسده، خلق ترلر ایدی،
ولئیک قار یاغیر ایدی ائشیکده شیدّتله.
یؽغیلدی سۆفره، تامام اولدو مجلیس-عیشرت،
ایاغه دوردو جماعت یئریندن عیزّتله.
عباسینی گؤتورن ائیلهدی "خوداحافیظ!"
یولا سالیردی قوناقچی بیزی نزاکتله.
فناریلر یاخیلیب، کوچه چۆن ایشیقلاندی،
دئدیم رفیقه: باخ ایندی او یانه دیقتله!
باخیب، نه گؤردو، پریشان و بینوا بیر جمع
آیاقیالین، بدن عۆریان، دوروبلا ذیلّتله.
نه رنگ واردی، نه قان اۆزلرینده، دمبسته،
باخیردی خلقه او بینور گؤزلر حسرتله.
دئدیم رفیقه: گؤرورسن او طیفل-معصومی،
دوداقلاری گؤیریب، جنگ ائدیر طبیعتله؟
او عؤورته نظر ائت، ایلشیب بوز اۆستونده
باشی آچیق، دوناجاق بو گئجه او حالتله.
روا دئییل باخاسان خاریجی کیمی اونا سن،
عباوی سالمایاسان باشینا محبّتله.
جییر کباب ائدیجی حالدیر بو حال، ای دوست،
نئجه گئدیب یاتاجاقسان ائوینده راحتله؟
رفیق یومدو گؤزون، ترلهدی خجالتدن،
باشین آشاغی سالیب کئچدی، گئتدی سۆرعتله.
دالینجا سسلهدی معجز: رفیق، دور، گئتمه،
گرک کی، تیترهیهسن سن ده بو جماعتله!
بو یارهلی باجیلار مرهم ایستهییر سندن.
هارا قویوب گئدیسن، خلقی مین جراحتله؟