اونونچون بیشیردی ارشته آشی

تمثیل
ایختیسارلا
ائشیتدیم کی، لکلک گئدیب بیر گونو،
ناهارا قوناق ایسته‌دی تولکونو.

اونونچون بیشیردی ارشته آشی،
مثل دیر: «قییینماز واریندان کیشی».

لولئینه تؤکوب آشی قویدو اؤیه،
دئدی: «اؤزگه قاب یوخدور آش تؤکمه یه.

چناغی اوشاق سیندیریب دیر بو گون».
قاباقجا اوزاتدی اؤزو دیمدیگین-
لولئینه، دئدی تولکویه: میل ائدوز!
بو حالی گؤروب تولکو اولدو قودوز.

ولی، ایستمزدی گتیرسین اوزه،
کیشی بئیله دملرده، خوشدور دؤزه.

دئدی لکلکه: «ای مبارک لیقا،
بو گون من، غذایا یوخوم ایشتها.

دییبدیر سویوق، خوش دئییل حالتیم،
جانیم چیمچشیر، گیز-گیز ائیلر اتیم.

ولیکن بودور، بنده عرضینی سیزه،
گلین صبح چاغی ناهارا بیزه.

منیم حالتیم ده سحر چاغی چاق –
اولور، بیر-بیریلن بیر آز گوبلاشاق».

دئدی تولکییه لکلک: «ای مهربان،
سیزه گلمه یه حاظرام هر زامان.

ولیکن بو اولدو منیم چون دوگون
اورکده کی، سن ایچمدین آش بوگون».

دئدی لکلکه تولکو: «اولما ملول،
بو زحمت کی، چکدین منه وار قبول.

مرخص اولوم من، گئدیم منزله،
سحر تئز گلین، سورتمه یین ال-اله».

ناهارا بیشیردی بولاماج آشی،
سوپردو، تمیز ائیله‌دی بیر داشی.

جالادی اونون اوستونه آشی او چاغ،
دئدی لکلکه: «میل ائدیز داغ-داغ!
حیف دیر بو جور آش اولسون سووق.
بویور، تا سووق اولماییب، اول یاووق».

باخیب آش و داشه، ایشی آنلادی،
پشیمان اولوب اؤز-اؤزوندانلادی.

کی، «ووردوم من اوّلده یولداشیما –
بو رنگی، بو گون گلدی اؤز باشیما.»

بو، تورکه مثل دیر: گلیر باشینا،
هر اول کس ائدر هر نه یولداشنا.

دئدی: «نئچّه گون بوندان اؤن، گلدی، زاغ،
بیزیم منزله، بیز چکمیشدیک جیناغ.

کمک ائتدی تاری، اونو اودموشام،
بو گون نذر ائدیب من، اوروج توتموشام.

من اؤز نذریمی سیندیرا بیلمزم،
جهنم اودونا باشارمام دؤزم».

دیلین سالدی تولکو سیگیردی آشی،
یالادی یئرین، پاک قیلدی داشی.

دئدی: «ای قادان اؤزگه‌لر جانیما،
بو آش اولمادی هئچ گوارا منه،»
دئدی لکلک: «ای دوست پاکیزه حال،
بو مطلب دئییل اولگیلن بیخیال.

عزیزیم، گتیردیم سنینچون مثل،
بیرین گر قوناق ائتدین، اولما دغل.»

ارن لر دئییبلیر کی، «ائو صاحبی،
قوناغین قاباغینا قویسون قابی.

یئمکده قوناغی گرک گؤزه له یه،
یئییم گر آز اولدو، اؤزو آز یئیه.

اوشاغی قوناق یانینا قویماسین،
قوناق گر دئیر «قوی گله» اویماسین.

اگر اوزده هر قدر اوخشار، اؤیر،
اورکده اوشاغین آتاسین سؤیر.

اؤزو گر اوشاغین چوخ ایستر کیشی،
گورکمز گله اؤزگه لرده خوشی».

بیری من، اوشاقدان گلیر چوخ بدیم،
اوشاق صاحبی آنلاماز، من نئدیم؟
اوشاغی پیس اؤیرتمه، اؤیدورمه چوخ،
هر اول کیم، اوشاغین اؤیر، آغلی یوخ.

بو سؤزدن داریلما، گرک ای ده ده،
اوشاغا گرک آتاسی ادب اؤیره ده،
هر اول کس کی، اؤز اوغلونو اؤیدورور.
آتاسین، اؤلندن سورا، سؤیدورور.
آتادان، او خوشدور اگر آنلایا.
اوشاق بوش دوراندا دؤیه، دانلایا.
اوشاغا اول استاد وئردی امک،
کی: سؤیدو، آجیقلاندی، ووردو کؤتک.
داش ایستر کج اولسون، گرک دیر پیشه،
گئجی دؤیمه سن، بیلمه گلسین ایشه.
سنی گر دؤیر، دوست دور هیدجی،
کی، گلمز ایشه دؤیمه سینلر گجی.