بیلمنم مندن نئچون اول سئوگیلی جانان کۆسوب
بیلمنم مندن نئچون اول سئوگیلی جانان کۆسوب،
اۆزومه باخماز دخی، بیر گؤزلری مستان کۆسوب،
آغلادیر قانلار منه، رۆخسارهسی خندان کۆسوب،
قارا گۆنلرده قویوب منی، مه-تابان کۆسوب،
کؤنلومون شهرین سراسر ائیلهییب ویران، کۆسوب.
باغریمی وئرمیش کسر کیرپیکلرین الماسینا،
آغلاماقدان گؤزلریم دؤنموش ایکی قان تاسینا،
گئجه-گۆندوز دۆشموشم دردو غمین دریاسینا،
رحم قؽلماز، آه کیم، اؤز عاشیق-شئیداسینا،
دردی اؤلدوردو منی، بیر ائیلهمز درمان، کۆسوب.
ائیله کی، گؤرر منی، یایلیق چکر رۆخسارینه،
بیر زامان قویماز تاماشا ائیلهییم دیدارینه،
دانیشار غئیریله، باخماز من قدیمی یارینه،
نه دئمیش مندن رقیب اول خوبلارین سردارینه؟
گلمیشم عرضه، نهایت، ائیلهمز دیوان، کۆسوب.
بو قدر کیم، سؤیلرم، توتماز منه قولاغینی،
یولونا اۆز قویموشام، باسماز گؤزل آیاغینی،
نئیلرم جانیمین اولماق دخی ساغ قالماغینی،
دؤندریب اۆزون، یؽغیبدیر قاشینی، قاباغینی،
ائی کؤنول، گل اولالیم بو دیلبره قوربان، کۆسوب.
دانیشیب گۆلمز اۆزونه اول پریوش واقیفین،
سؽندیریب کؤنلون، یاخیب جانین مۆشوّش واقیفین
اول سببدن جانینا دۆشموش بیر آتش واقیفین،
جۆرمو تقصیری نهدیر، یارب بلاکش واقیفین،
سؤیلرم مونجا، ائشیتمز داد، الامان، کۆسوب.