نه خوشدور باش قویماق بیر گۆلندامین قوجاغیندا

نه خوشدور باش قویماق بیر گۆلندامین قوجاغیندا،
تاماشا ائیله‌مک اول حلقه زۆلفه آغ بوخاغیندا،
دوروب اوندان، توتوب نازیک الین گزمک اوتاغیندا،
قوجوب-قوجوب اوتورماق گاه سولوندا، گاه ساغیندا،
سینه‌سینده سینه، بوینوندا قول، دوداق دوداغیندا.

اۆزوندن، ائیله‌ییب قۆستاخلیق، دستار-زر آچماق،
یئنیندن دۆیمه، اوندان سونرا بئلیندن کمر آچماق،
چکیب یاشماغین آغزیندان روان، لعل و گؤهر آچماق،
چؽخاریب ج‍ۆمله اثوابین، وۆجودون سربه‌سر آچماق،
همین بیر اینجی‌سین قویماق قارا زۆلفون قؽراغیندا.

اوزون ساچین قوجاقلاییب، تؤکوب قدّ-بۆلندیندن،
تؤکوب میثل-بنفشه اییله‌مک هر بیر کمندیندن
یاخاسین چاک ائدیب، کؤکسون چؽخاریب باغ و بندیندن،
امیب دویونجا شیرین آغ ممه‌نین شهد-قندیندن،
قویوب بیر لحظه باش، یاتماق گیریبانین بوجاغیندا.

سمن جیسمه ساریلماق، ائیله‌مک بیر قدر راحتلر،
آرالیقدا اولوب بیر-بیرینه لۆطف و عینایتلر،
یوخودان تئز دوروب صرف ائیله‌ییب دۆرلو ظرافتلر،
یویوب ال، اوتوروبن دیزبه‌دیز ائتمک حکایتلر،
دئمک بیر-بیرینه باشدان کئچن حالی فراقیندا.

ائدیب بیر مۆختصر صؤحبت، خبردار اولمامیش اغیار،
یئنیدن آند ایچیب، شرط ائیله‌ییب، عهد و ایمان، ایقرار،
آلیب بیر بو اۆزوندن، او اۆزوندن بوسه‌ی-تکرار،
او زۆلف-یاسمندن حسرت ایله آیریلیب ناچار،
گنه واقیف کیمی بیر دخی اولماق ایشتیاقیندا.