من جاهان مۆلکونده، مۆطلق، دوغرو حالت گؤرمهدیم
من جاهان مۆلکونده، مۆطلق، دوغرو حالت گؤرمهدیم،
هر نه گؤردوم، ایری گؤردوم، اؤزگه بابت گؤرمهدیم.
آشینالار ایختیلاطیندا صداقت گؤرمهدیم،
بیعت و ایقرار و ایمان و دیانت گؤرمهدیم،
بیوفادان لاجرم تحصیل-حاجت گؤرمهدیم.
خاه سولطان، خاه درویش و گدا بالاتفاق،
اؤزلرین قؽلمیش گیریفتار-غم و درد و فراق،
جیفهی-دۆنیایهدیر هر احتیاج و ایشتیاق،
مونجا کیم، ائتدیم تاماشا، سؤزلره آسدیم قولاق،
کیذب و بؤهتاندان سوایی بیر حکایت گؤرمهدیم.
هر صدا و سس کی، دۆنیایا دولوب اکثر اقل،
جۆمله مکر و آل و فنّ و فیتنهدیر، جنگ و جدل،
دیرهم و دینار اۆچوندور هر شئیه یاپیشسا ال،
مۆقتدیلرده ایطاعت، مۆقتدالرده عمل،
بندهلرده سیم و بگلرده عدالت گؤرمهدیم.
خلق-عالم بیر عجب دستور توتموش هر زامان،
هانسی غملی کؤنلو کیم، سن ائدر اولسان شادیمان،
او سنه، البته کی، بدگولوق ائیلر، بیگومان،
هر کسه هر کس کی، ائتسه یاخشیلیق، اولور یامان،
بولمادیم بیر دوست کی، اوندان بیر عداوت گؤرمهدیم.
عالیم و جاهیل، مۆرید و مۆرشید و شاگیرد و پیر،
نفس-عمّاره الینده سربهسر اولموش اسیر،
حقی باطیل ائیلهمیشلر، ایشلنیر جۆرم-کبیر،
شئیخلر شیّاد، عابیدلر عبوساً قمطریر،
هیچ کسده حقه لایق بیر عیبادت گؤرمهدیم.
هر کیشی هر شئی کی، سئودی، اونو بهتر ایستهدی،
کیمی تختی، کیمی تاجی، کیمی افسر ایستهدی.
پادشاهلار دمبهدم تسخیر-کیشور ایستهدی،
عشقه هم چوخ کیمسه دۆشدو وصلی–دیلبر ایستهدی،
هئچ بیرینده عاقیبت، بیر ذؤق و راحت گؤرمهدیم.
من اؤزوم چوخ کوزهکاری کیمیاگر ائیلهدیم،
سیکّهلندیردیم غۆبار-تیرهنی زر ائیلهدیم،
قارا داشی دؤندریب یاقوت-احمر ائیلهدیم،
دانهیی خرمؤهرهنی دۆرّه برابر ائیلهدیم،
قدر و قیمت ایستهییب، غئیر از خسارت گؤرمهدیم.
ائیلهین ویرانه جمشید-جمین ائیوانینی،
یولا سالمیش، بیل کی، بزم-عیشرتین چندانینی،
کیم قالیبدیر کی، اونون غم تؤکمهییبدیر قانینی،
دؤنه-دؤنه ایمتاحان ائتدیم فلک دؤرانینی،
اوندا من برکسلیکدن اؤزگه عادت گؤرمهدیم.
گۆن کیمی بیر شخصه گۆنده خئیر وئرسن صد هزار،
ذرّهجه ائتمز ادای-شۆکر-نعمت آشیکار،
قالماییبدیر غئیرت و شرم و حیا، ناموس و عار،
دئدیلر کی، اعتیبار و اعتیقاد عالمده وار،
اوندان اؤترو من ده چوخ گزدیم، نهایت، گؤرمهدیم.
مۆختصر کیم، بئله دۆنیادن گرک ائتمک حذر،
اوندان اؤترو کیم، دئییلدیر اؤز یئرینده خئیر و شر،
عالیلر خاک-مذلّتده، دنیلر مؤعتبر،
صاحیب-زرده کرم یوخدور، کرم اهلینده زر،
ایشلنن ایشلرده احکام و لیاقت گؤرمهدیم.
دؤولت و ایقبال و مالین آخیرین گؤردوم تامام،
حشمت و جاه و جلالین آخیرین گؤردوم تامام،
زۆلف و روی و خطّ و خالین آخیرین گؤردوم تامام،
همدم-صاحیبجمالین آخیرین گؤردوم تامام،
باشهدک بیر حۆسن-صورت، قدّ و قامت گؤرمهدیم.
یا امام الانس و الجن و شهنشاه-اۆمور،
گئتدی دین الدن، بو گۆندن بؤیله سن ائیله ظۆهور،
قویما کیم، شئیطان-ملعون ائیلهیه ایمانه زور،
شؤعلهی-حۆسنونله بخش ائت تازهدن دۆنیایه نور
کیم، شریعت مشعلینده ایستیقامت گؤرمهدیم.
باش آغاردی، روزیگاریم اولدو گۆن-گۆندن سیاه،
ائتمهدیم، صد حئیف کیم، بیر ماهی رۆخساره نیگاه،
قدر بیلمز همدم ایله ائیلهدیم عؤمرو تباه،
واقیفه، یا ربّنا، اؤز لۆطفونو ائیله پناه،
سندن اؤزگه کیمسهده لۆطف و عینایت گؤرمهدیم.