من یئنه خوبلارین پادیشاهیندان

من یئنه خوبلارین پادیشاهیندان
اؤزومه دوست بیر نیگاری توتموشام.
صیّاد اولوب قوروب محبّت تورون،
لاچین گؤزلو خوب شیکاری توتموشام.

دال گردندن دۆشوب توتوب دالی زۆلف،
خوش گؤستریر زنخدانی، خالی زۆلف،
گؤرمه‌میشم بئله بیر صفالی زۆلف،
چوخ سۆنبول-عنبرباری توتموشام.

آغ اۆزونده سیاه ساچی بۆرمگی،
دال گردندن دۆشوب باش ائندیرمگی،
میانیندا ساچین اوجون هؤرمگی،
بۆتون دۆنیادا بو یاری توتموشام.

واقیفم، گؤرموشم بیر طۆرفه دیدار،
چکرم گؤرمگه بیر ده اینتیظار،
هر کسین دۆنیادا بیر قیبله‌سی وار،
من ده یؤنوم سنین ساری توتموشام.