ای مکّهنی، مدینهنی یارادان
ای مکّهنی، مدینهنی یارادان،
بیر فیکیر چک احوالینا واقیفین.
اول قاشی قیبلهیه اۆز سۆرتمک ایستر،
مدد ائیله ایقبالینا واقیفین.
گؤزوندن ایراغا دۆشوبدور یاری،
کسیلیب کؤنلونون صبر و قراری.
اۆز چئویرمیش یئنه مدینه ساری،
نه دۆشوبدور خیالینا واقیفین.
منیم یاریم دئییل اول کعبهدن کم،
خال حجرالاسود، دهانی زم-زم،
بیر زامان اولسایدیم اونونلا همدم،
خط چکیلر وبالینا واقیفین.
سرخوش دوروب مینا بویلو ساغیدان،
یارالیدیر غمزهسی اول یاغیدان.
زۆلفو عنبر – آغلی باشدان داغیدان؛
نه سؤزو وار کمالینا واقیفین.
یۆز زۆلفو پریشان، هیندو خال اولسا،
یۆز شکر گؤفتارلی، لبی بال اولسا،
یۆز شیریندیل، عنبربو مارال اولسا
یئته بیلمز مارالینا واقیفین.