بیر صنمین سینه‌سینه مۆشتاغام

بیر صنمین سینه‌سینه مۆشتاغام،
چوخ چکیرم آه و زاری، شاماما!
من ها قالدیم حسرت، الیم یئتیشمز،
سن گئت، گؤر جانانی باری، شاماما!

مطلبیدیر بیر نؤورسته کؤنلومون،
اولمادی درمانی خسته کؤنلومون،
اونون اۆچون بو شیکسته کؤنلومون
نه صبری وار، نه قراری، شاماما!

یاخا آچیب تا کی، سینه گؤستردین،
سراسر باغریمی قانا دؤندردین،
منیم دردیمدندیر سنین ده دردین،
رنگیندیر نه یاووز ساری، شاماما!

منیم یاریم بیر عجایب دیلبردیر،
اۆزو تزه گۆلدور، زۆلفو عنبردیر،
ساناسان کی، ایکی قند و شکردیر
قوینونداکی قوشا ناری، شاماما!

قوربانام واقیفین بو خامه‌سینه
کی، یازار دردینی دوست نامه‌سینه،
یئته بیلمز یارین شامامه‌سینه،
اولسا بو دۆنیانین واری شاماما!