جان وئریب یۆز مینّت ایله آلمیشام
جان وئریب یۆز مینّت ایله آلمیشام،
گؤندریرم سنی یاره، شاماما!
تازه تاغدان اۆزولوبسن، اوخشارسان
یارین قوینونداکی ناره، شاماما.
جیسمین نه نازیکدیر، گۆل بدن کیمی،
بیر خوش قوخون گلیر، یاسمن کیمی،
نهدن سارالیبسان سن ده من کیمی،
نهدیر دردین، ای بیچاره شاماما؟
حاقدیر، سنده واردیر خئیلی نزاکت،
یارین شاماماسی بیر غئیری بابت؛
قورخورام چکهسن کۆلّی خجالت
دورسان اونلا برابره، شاماما.
یارین شامامهسی اوخشار شکره،
حئیران اولور ملک، اگر گؤستره،
یاراشیقدیر آغ سینهسی مرمره،
قؽلیب چوخ جیگرلر پاره، شاماما.
گیریباندان ناگاه اولاندی آشکار،
داغیلیر عاقیلیم، هوشوم – هر نه وار،
خسته واقیف طیفیل کیمی قان آغلار،
نئچون قؽلمازسان بیر چاره، شاماما؟