بدنینی گۆل یارادان الهی

بدنینی گۆل یارادان الهی،
سراسر عطرینی عنبر ائیله‌دی،
گؤزللیکده کیمدیر سنه تای اولا،
حۆسنون ملکلری چاکر ائیله‌دی.

صورتینی چکدی اول گۆن کی، نقّاش،
جمالینی قؽلدی هر گؤزلدن باش.
جبینینه قویدو بیر مۆقوّس قاش،
سیاه کیرپیگینی خنجر ائیله‌دی.

زۆلفونو بنزتدی مۆشکین کمنده،
اوجون حلقه قویدو سیب-زغنده،
لبی‌یین لذّتین بنزتدی قنده،
دهانینی شند و شکّر ائیله‌دی.

سنی خلق ائیله‌دی گۆل دسته‌سی تک،
پریدن اعلاسان، ملکدن گؤیچک،
جیسمیندیر مۆنوّر آغ و نازیکرک،
اول سمن سینه‌نی مرمر ائیله‌دی.

ای گؤزللر شاهی، کرم ائت مانا،
باخماگیلن هرگیز اغیاردان یانا،
شۆکر اولسون الله‌ا – واقیفی سانا
قاپیندا غولام-کمتر ائیله‌دی.