گل گل که سندن آیری داخی یار بیلمهنم
گل گل که سندن آیری داخی یار بیلمهنم،
بیگلشن وصال تو گلزار بیلمهنم.
وئرمن بو چرخ کجرو غدّاره کؤنلومو،
اول تجرّدم که عالم غدّار بیلمهنم.
عشقین قدیم و مهر رخون لایزال ایمیش،
من بوندان اؤزگه نکتهی اسرار بیلمهنم.
خمر لبیندن اسریمیشم، یاز خمار می،
خمر لبین کیمی داخی خمّار بیلمهنم.
منصوروار اگر چه منی داره چکسهلر،
دارالشفا دییرم من اونو، دار بیلمهنم.
گر قویموشام لباسیمی میخانه ده گرو،
سرمست بادهام، سر و دستار بیلمهنم.
شمع رُخوندا جانیمی پروانه قیلمیشام،
اول ناره دوشموشم داخی من نار بیلمهنم.
پیوسته قاشلارین کیمی محرابه باخمانام،
مستانه گؤزلرون کیمی عیار بیلمهنم.
شرح لبین چو نطقه گتوردی حقیقینی،
من بوندان اؤزگه نطق دُرَربار بیلمهنم.