سحر گۆن تک چؽخمالیسان،
دۆنیا سنه احسن دئسین.
گؤزمونجوغو تاخمالیسان
گؤزلرینه گؤز دیمهسین!
دینیر سۆکوتوندا
سحیرلی سسلر
قونماسین گؤزلره غم، کدر، گؤزل!
قارانلیق گئجهدن رنگ آلان گؤزلر
بس نیه نورلودور بو قدر، گؤزل؟
بلکه دئییلمهمیش
سیرلی بیر سؤزم،
قلبیم گتیرمهمیش دوداغا منی.
گؤزللیک اؤنونده من کی، گۆجسوزم،
گؤزلرله گل، چکمه سؽناغا منی.
قالماسین آرزویلا
اۆمید یاریدا،
شفقلر اۆفوقده زر نیشان کیمی،
سونسوز آسیمانین اولدوزلاری دا
سؽغینیب گؤزلره کهکشان کیمی.
یئردن گۆج ایسترم،
سمادان کؤمک،
اؤتوشسون اۆمیدله ایل دالینجا ایل.
مگر آیریلیقدیر گؤزلردن اؤپمک،
بو آیا، اولدوزا قوووشماق دئییل؟
من سنی قلبیمه
مهریبان سایدیم،
سنینله گؤروشدوم یاز چاغیندا من.
سئوینجدن گؤیلره قانادلانایدیم،
ظۆلمتلی گؤزلرین ایشیغیندا من.
حسرت ده دوغمادیر
دۆنیا اۆزونده،
یولونا زیللنیب گؤزلریم یئنه.
عؤمرون آغ گۆنونده، قارا گۆنونده،
او قارا گؤزلری گؤزلرم یئنه.
3 آپرئل ۲۰۰۱