الی چؽراقلی

کئچدیک عصرلردن
   صداقت — دئیه،
سعادت آختاردیق الی چؽراقلی.
هم یئره باغلاندیق،
   هم ده کی، گؤیه،
حقیقت آختاردیق الی چؽراقلی.

نه قدر سیرلیدیر
   یوللاری عؤمرون
اینسان داغلار آشیر الی چؽراقلی.
نئجه آی گۆن اۆچون،
گۆن ده آی اۆچون
اۆفوقلر دولاشیر الی چؽراقلی!

غملره محکومسان
   تنها قالینجا،
اولورمو کدر ده الی چؽراقلی!
اصل محبّتین
   گئدیر دالینجا،
اصل سئونلر ده الی چؽراقلی.

میلیون سواللارا
   بیر جاواب گلیر،
جاواب گز، سوالا الی چؽراقلی.
تک الی چؽراقسیز درد، عذاب گلیر
سن اونو قارشیلا الی چؽراقلی!

دورور زیروه‌لرین
   قاری ساچیمدا،
گؤیلره واریرام الی چؽراقلی.
اولوملا اؤلومون
   یول آیریجیندا
بیر دوست آختاریرام الی چؽراقلی!

چینیمده عذابلار
   آغیر بیر قایا
آرخامدا دردله غم الی چؽراقلی.
من الی چؽراقلی
   گلدیم دۆنیایا.
دۆنیادان گئدرم الی چؽراقلی!

16-17 نویابر ۱۹۹۷