نه کیچیک گؤرونور داغلار اوزاقدان

نه کیچیک گؤرونور داغلار اوزاقدان،
باخیرسان کؤنلونده مین خیال اولور.
بیر اوووج گؤرونور باغلار اوزاقدان،
داغ بویدا پالیدلار قارا خال اولور.

دایانیب باخدیقجا ائله گلیر، سن
الینی اوزاتسان چاتار زیروه‌یه.
بو خیال ایچینده یاخین گلیرسن،
داغلار اوزاقلاشیر، یۆکسلیر گؤیه.

گؤرورسن: اوجادیر داغلارین باشی،
اونون سؽلدیریمی، یارغانی واردیر.
پارلاق اولدوزلاردان ایپک بالیشی،
قالین دومانلاردان یورغانی واردیر.

بزنیب، یئنه ده نورلا چؤل-باییر،
یئنه چیچک آچیر داغلار، چمنلر.
بلی، حقیقته یاخین اولماییر،
بعضاً اوزاغی دا یاخین گؤرنلر!

۱۹۵۶