چینارلی مزار

الی کریمه
اۆزلره قونوبدور
   بیر غریب تبسّوم،
گؤزلرده دونوبدور
   بیر غریب تبسّوم.
قلبیمده بیر هایلی،
   هارایلی
       سۆکوت وار.
چاغیران،
هایقیران
   بیر آیری سۆکوت وار.
اۆستو داش دۆزولو
   بیر مزار گؤرورم،
دوستلاردان کۆسولو
   بیر مزار گؤرورم.
آ تورپاق، قوینوندا
   اویویان او کیمدیر؟
او مزار، چینارسیز،
   دئیردیم یئتیمدیر،
لایلاتک سسلنر
   چینارلار، چینارلار،

عزیز بیر کؤرپه‌نی
   آنارلار چینارلار،
- تئز گئدیب، تئز گلدین —
   دئیرلر چینارلار!
آناتک اونا باش
   ایرلر چینارلار!
..بیر دینن اۆرکدیر
   او اسن کۆلکلر،
هاردانسا هاراسا
   تلسن کۆلکلر.
هارداسا بیر گلین
   اۆچ اؤولاد بؤیودور،
ائله بیل اۆچ سیرلی
   کاینات بؤیودور.
کؤنلومده پاییز تک
   دومانلی سۆکوت وار،
   یئرده ده، گؤیده ده
توفانلی سۆکوت وار.
   ...قلبیمده بیر علی
 نیسگیلی
 یاشاییر،
قلبیمده بیر علی
 هئیکلی
یاشاییر!...

۱۹۶۹