دئ، هاردان گلیرسن؟
— دوستاقخانادان!
دئ، هارا گئدیرسن؟
— دوستاقخانایا!
(ائشیتدیگیم صؤحبتدن)
— نولوب کی، همیشه
سن محبسدهسن؟
— بیر دفعه "ایستعفا" قؽشقیرمیشام من!
— تک سندین قؽشقیران؟
— من یاخالاندیم،
چوخو قاچیب گئتدی، منسه دایاندیم!
بیر بؤیوک محبس وار، بیری ده کیچیک،
هر ایکی محبسده بیزلر بیر هئچیک!
— نئجه؟
— بؤیوک محبس اؤلکه قدردیر
اوردان رحیم اومماق تامام هدردیر.
من بؤیوک محبسده عادی کؤلهیم،
بیلمیرم، یوردوما نه تهلوکهیم؟
من بوردا بدبختم،
من اوردا یادام،
من کیچیک محبسده داها آزادام.
دوغرودان دۆنیادا آرزولار حاقمی؟
محبس قاپیلاری آچیلاجاقمی؟
28 نویابر ۲۰۰۰