سنی تانیدیقجا...

سئوگی چاغلادیقجا گور عۆمّان کیمی،
الچاتماز اولورسان کهکشان کیمی،
بعضاً ده کۆلک تک سویوق اسیرسن،
سنی تانیدیقجا سن منه سیرسن،
سیرلر آچیلدیقجا سن یئنه سیرسن!

بعضاً گۆنش اولوب سن یاندیریرسان،
بعضاً ده یولوما سپیلن قارسان.
"سئویرم" — سؤزومدن بلکه بئزیرسن؟
سنی تانیدیقجا سن منه سیرسن.
بو گۆنه مؤعجوزه، دۆننه سیرسن!

بعضاً ائرکن سؤنن چؽراق اولورام،
یاخینا گلیرم، اوزاق اولورام.
گئدیرم، یولومو نیه کسیرسن؟
سنی تانیدیقجا سن منه سیرسن.
سیرلر آچیلدیقجا سن یئنه سیرسن؟

صاباحا اۆمیدین دئ وارمی، کؤنلوم؟
گؤروشسوز دوغمالیق اولارمی، کؤنلوم؟
ای اۆرک،
سن عشقه قولسان، اسیرسن،
بلکه سن اؤزون ده معنالی سیرسن؟
یوخ، سیرلر ایچینده ان عالی سیرسن!

8 مارت ۱۹۹۸