اولدوزلار و سن

اوزاق کایناتدان
گلن نورموسان،
گؤزونده الهی
ایشیقلارمیدیر؟
دئ، هانسی اولدوزدا
سن دوغولموسان،
یئرده سنین کیمی
گؤزل وارمیدیر؟

بلکه بیر آرزونون
قانادی‌ییق بیز،
اۆرکلر قوشادیر،
اۆرکلر یالقیز.
آیین، اولدوزلارین
اؤولادی‌ییق بیز،
بس نیه باریشمیر
اولدوزلاریمیز؟

بلکه دوغمالاریق،
بلکه یادلاریق؟
بلکه باشقا-باشقا
کایناتلاریق!

یوخ، سن طالعییمده،
عؤمرومده وارسان،
آیری بیر اولدوزدا
آختارما منی!
والله، سن او قدر
جازیبه‌دارسان،
جاذیبه قۆّه‌ندن
چؽخارما منی!

ناگاهان گؤروشلر
کئچیر آن کیمی،
سون وئرمیر اۆرگین
ایختیشاشینا!
آی گۆنش باشینا
دولانان کیمی،
قوی من ده دولانیم
سنین باشینا!

اولدوزلار ان نورلو،
اوزاق نغمه‌دیر،
حیاتین نغمه‌سی
سنین سسینده.
سنسیز یئر کۆره‌سی
بیر افسانه‌دیر،
یاخشی کی، سن وارسان
یئر کۆره‌سینده!

14-15 مارت ۱۹۹۸