سولاری چاغلایان
عۆمّان صحرادا،
آغاپپاق آدادیر هر تیترک چادیر.
اریییر تۆستو تک
دومان صحرادا،
چادیرا سؤیکنیر سؽرا چادیرلار.
اۆفوقدن اۆفوقه گئدیب چاتیرلار.
ائله کی کۆلکله آغ قار النیر،
صحرادا دهشتلی هارای سسلنیر.
قاچقینلار سو اۆچون قاچیر اوباشدان،
یوللاردا پالچیغا، زؽغا باتیرلار.
سویوقدان، کۆلکدن، قاردان، یاغیشدان
اونلار چادیرلاردا نئجه یاتیرلار؟
اوشاق "چؤرک" دئیه غملی دایانمیش،
گؤزلر یول چکمکدن آلاجالانمیش.
تیترهییب دهشتلی یئللر اؤنونده
هر اۆرک — ائله بیل یارالی بیر قوش.
دؤرد یاندان آخیشان سئللر ایچینده
آنانین دؤشونده سۆدو قوروموش.
بدنلر نه دمیر، نه ده کی، تونجدور،
ان ضعیف جانلیدیر ظریف جانلیلار.
سویوق توفاندان دا داها قورخونجدور،
اینسان طالعینه سویوققانلیلار.
اونلار کئفه باخیر — آزاجیق گئنده،
وورور بالا-بالا، دئییب گۆلورلر.
بورا هومانیتار یاردیم گلنده،
بیزیم "هومانیستلر" یاری بؤلورلر.
ائی قار، قؽش گلمهمیش نیه یاغیرسان؟
تورپاقلار آغاپپاق، سولار قاپقارا.
سن ده گؤی قۆبّهسی!
ماوی چادیرسان
رحم ائله یئردهکی بوز چادیرلارا!
کاش من اؤز کؤکسومو
یارا بیلهیدیم،
بو درد ده منیمدیر، بو غم ده منیم.
کاش ائله بیر چادیر قورا بیلهیدیم،
هامی ایسینهیدی سینهمده منیم.
12 دئکابر ۱۹۹۳