جبهه‌دن قاچان اوغلان

او جبهه‌دن قاچیب گلدی،
   گلدی آتا ائوینه،
دؤیدو دوغما بیر قاپینی
   او سئوینه-سئوینه‌:
— آنا!
— نئجه قاپی آچیم
   من جبهه‌دن قاچانا؟
— من گلدیم کی، سیزی گؤروم.
   — یوخ، بونا دؤزمز آنا.
سنه هۆنر آدی وئردیم،
   من آرزوما یئتمه‌دیم.
ایگید اوغول بسله‌دیم من،
   فراری بؤیوتمه‌دیم.
اوغول، قاییت تئز جبهه‌یه،
   بویونا قوربان اولوم،
سنی گؤرمک ایسته‌میرم
   فراری تک، آی اوغلوم.
گئدیر جاوان...
کور-پئشیمان...
   تانیش یولا دۆزلیر.
سونرا دؤیور بیر قاپینی...
   او قاپیدان سس گلیر
— کیمسن؟
— منم.
— قاچمیسانمی؟
   قؽز دئدی قلبینده غم:
— من فراری سئومه‌میشم،
   من قهرمان سئومیشم.
گئدیر جاوان...
کور-پئشیمان...
   "بو نه ایشدیر" — دئییر او،
یولدا تانیش بیر دۆکانین
   قاپی‌سینی دؤیور او،
بیر اوجابوی اوغلان چؽخیر،
   اۆزو گۆلر، سسی شن:

— ا، بو سنسن، کؤهنه دوستوم،
   عجب ائدیب گلمیسن!
اولوب بوردا بیز شریک،
   بالا-بالا ایشلریک.
یول اوستونده تاختا دۆکان —
   شاملارین کؤلگه‌سینده،
ائله مشوم هارای وار کی،
   کۆلکلرین سسینده.
او هارایا گئدیردیسه
   اؤزونو یاد سانیردی،
آیاغی‌نین آلتدا سانکی
   یئر اود توتوب یانیردی.
او، هر کسدن گیزلنیردی،
   قلبده گۆناهی، سوچو.
او گۆندوزلر ساتیجی‌یدی،
   گئجه‌لر قارووولچو.
گؤر خیانت ائدن زامان —
   نئجه آلچالیر اینسان!
بیر گۆن ائله یاغیش یاغدی،
   شیدّتلی سئللر آخدی.
گؤی شاملارین زیروه‌سینده
   اودلو ایلدیریم چاخدی،
بیر ده شیمشک چاخاندا
   شام دا یاندی، دۆکان دا.
هایلا گلن وایلا گئتدی —
   بیرجه آنین ایچینده،
فراری ده کۆله دؤندو
   او دۆکانین ایچینده.
نامرد اوغول جبهه‌لردن
   قاچیب گلدی، نه گؤردو؟
فراری‌نین جزاسینی
   طبیعت اؤزو وئردی.

4-5 نویابر ۱۹۹۳