بو گۆن درد آغیردیر، یارالار درین،
سن دۆشمن اۆستوندن توفان اولوب کئچ.
دئیین، قارشیسیندان ناکیشیلرین
قاچماق کیشیلره یاراشارمی هئچ؟
آتان سئودی خالقی، بیلیرسن اؤزون،
کئچدی قانلی عصرین بورانلاریندان.
سؤیله کیمدن قورخوب، قاچیرسان بو گۆن
دۆنیانین ان قورخاق اینسانلاریندان؟
مردلره سؤیکنر وطن داغ کیمی،
دؤیوشسون کیمین کی، غئیرتی وارسا.
جاهاندا ان بؤیوک بلا دئییلمی،
اوردو قاچقینلاردان اوّل قاچارسا؟
بو بیر حقیقتدیر دۆشوب دیللره:
ایگید بیر یول اؤلر، قورخاق مین کره.
نیه بئله اولدون، سن هاردا، هاچان؟
گئتمیشدین ایگیدلر سؽراسیندا سن.
جبههدن دابانا تۆپوروب قاچان،
"مردسن" پیشتاختالار آرخاسیندا سنی
ارمنی باش کسر، هئچ "اوف" دا دئمز،
بو گۆن هارای چکیر کندلر، اولوسلار.
سؤز وار کی، ناموسو ایته آت، یئمز!
ناموسا سوساییب بو بیناموسلار.
خالقین ناموسودور وطن تورپاغی،
هر شئیدن اوجادیر ناموس بایراغی.
قالخسین قوی اؤزونو اینسان سایانلار،
بیزدهدیر متانت، بیزدهدیر دؤزوم.
دۆنن قاپیمیزدا قاب یالایانلار،
بو گۆن قانیمیزی ایچسینلر بیزیم؟!
خیالا دؤنمهسین لیاقتیمیز،
آخی ناموس، عیصمت تاپدانیر بو گۆن،
بیزیم اؤزوموزه خیانتیمیز،
هۆنره چئوریلیر دۆشمنلر اۆچون.
قوی داها دۆشمهسین ویجدانا لکه،
گئت ائل کئشیگینده دور آییق-ساییق.
وئرمیشیک تورپاغی بیز بؤلگه-بؤلگه،
ایندی قاریش-قاریش قایتارمالیییق.
ائللر اوجا توتوب اؤز وۆقارینی،
حاقا، صداقته او تمل قویوب،
بوردا ایگیدلرین قؽلینجلارینی
غئیرت سووارمیشدیر عصرلر بویو.
شاعیر، سن ده یوردون کئشیگینده دور،
وطن مۆقدّسدیر، وطن عزیزدیر.
بیزه بیزدن باشقا بیر آرخا یوخدور،
بیزیم قۆدرتیمیز غئیرتیمیزدیر!
بیزیم غئیرتیمیز قۆدرتیمیزدیر!
۱۹۹۳