چکین قاراباغدان قارا اللری


دوستوم، قارداشیم یوسیف نصیرلی‌یه

سینه‌مده دؤیونور بو یئرین قلبی،
اییلمز داغلارا بیر ده باش اییم.
واقیفین اۆرگی،
     اۆزئیرین قلبی
منیم اۆرگیمدیر، منیم طالعییم.
اسمه‌سین هیجرانین
     قارا یئللری،
چکین قاراباغدان قارا اللری!

قوزئیدن چایلارا گؤز یاشی سؽزیر.
غضب دالغالاری آخیر یوللارا.
یوردومون خان قؽزی،
     مهریبان قؽزی،
ناتوان نیگاران باخیر یوللارا.
آخماسین وادی‌نین
     قارا سئللری،
چکین قاراباغدان قارا اللری!

دار گۆنده سؽنانار نسلین غۆرورو،
غئیرت حقیقتین مۆقدّسیدیر.
فیکرتین خیالی —
     زیروه‌لر نورو،
بۆلبولون نغمه‌سی داغلار سسیدیر.
بیر ده من گؤرمه‌ییم
     قارا ایللری،
چکین قاراباردان قارا اللری!

کۆکره‌ییب غضبدن اود تؤکر قؽشیم،
قولومدان برک توتسون قارداشیم گرک.
قاریشسا یاد ائله
     بیرجه قاریشیم،
اؤزوم ده تورپاغا قاریشیم گرک.
چکین بو تورپاقدان
     قارا اللری!
چکین قاراباغدان قارا اللری!

۱۹۸۸