نوهم وۆصالین باغ دۆشونجهلری
یاز تعطیلی گلینجه،
باهاری دا، یایی دا.
من یاتیرام هر گئجه،
سحیرلی چارپاییدا.
یومان کیمی گؤزومو
مؤعجوزهلی دۆنیادا،
من گؤرورم اؤزومو،
شفقلرله قول-قولا
چؽخیرام اوزاق یولا،
بولودو یارا-یارا
آسیمانا اوچورام.
اوچورام اولدوزلارا،
کهکشانا اوچورام.
گؤیلره چاتدیقجا من،
روحوما قاناد گلیر.
گؤرورم کی، اۆفوقدن
آتش یاللی آت گلیر.
نورلادیر گؤیو، یئری،
زر تئللر آلوو کیمی،
او پارلایان تئللری
توتورام جیلوو کیمی.
سما! منه یول ائیله،
بو گۆن یوللار منیمدیر!
کهکشان اۆزرییله،
آت چاپیرام من ایندی!
آت اوچور اوزاقلارا،
اولدوز-اولدوز داغلارا.
شفقلر ساچاق-ساچاق،
مین سیرّ سؤیلهییر منه،
باش قویورام آستاجا
آیین بیاض کؤکسونه.
دان سؤکور آرام-آرام،
من بیردن اویانیرام.
اولدوزلاردا یاتیرام،
یئردهسه اویانیرام.
۱۹۹۴-۱۹۹۵