قلبیمین آتشی
آلیشار، سؤنمز،
اولوب کئشمکئشلی
عصرلر، ایللر.
بیر دیلیم وار منیم -
زنگین، مۆقدّس،
اسیبدیر اۆستوندن
همیشه یئللر.
منی دۆشوندورور
بو معنالی سیرّ،
هارا گئدهجکدیر
سؤزون منزیلی؟
تۆرک قارداش آذری تۆرکجهسی دئییر،
بیز ایسه دئییریک مۆطلق تۆرک دیلی...
اولودور سؤز قلبه
هماهنگ اولسا،
دیل خالق اۆرگینین انگینلیگیدیر.
قارداش دیللریمیز
رنگارنگ اولسا،
بو قارداش دیللرین زنگینلیگیدیر،
بیز تۆرکوک، هر تۆرکون
دوغما ائلی وار،
هر تۆرک خالقینین دا
اؤز خالق دیلی وار.
داهیلر یوردودور، اودلار اؤلکهسی.
ائله میلّتیک کی، قهرمان، قدیم...
گلیر چالدیراندان
خطایی سسی:
هانی دؤولت دیلی اعلان ائتدیگیم؟!
واقیفه باغلییام
طالعیم کیمی،
اوندا اوجالیق دا،
درینلیک ده وار.
صابیردن، وورغوندان
اۆز دؤندرکمی؟
اونلار خالق دانیشان
دیلده یازیبلار.
مۆشفیق! قوی شاعیرلر سؽراسیندا او،
قالسین بو دیللرین آراسیندا او،
خالقین اۆرگیندن
غم چکیلرمی،
خالقین اۆرگیندن
گلمهسه قانون،
۲۶ نفر یازا بیلرمی.
قطعی طالعیینی نئچه میلیونون؟!
یوخ، دیل عصرلرین
طالع سسیدیر،
آذربایجان دیلی -
بۆللور بیر بولاق...
دیل خالقین آدیدیر،
خالقین اؤزودور.
دیلین ایختیاری
خالقدادیر آنجاق...
23-26 دئکابر ۱۹۹۳