عؤمرون آغیر گئدیر کاروان ایللری،
اینتیظار قوش اولوب قوی اوچسون — دئدیم.
منیم غم چاییمین درد ساحیللری،
طالع کؤرپوسونده قوووشسون — دئدیم.
کؤکو درین اولسون،
قانادی اوجا،
اونون اؤزولونو قانیملا تؤکدوم.
عؤمور داشلاریندان کؤرپو سالدیقجا،
ساندیم، کدریمی چارمیخا چکدیم.
تؤکولدو اولدوزلار
کاهکشان کیمی،
سانکی یئره چؤکک دوماندی کؤرپو.
قوللاری گئن آچان بیر اینسان کیمی،
ساحیلدن-ساحیله اوزاندی کؤرپو.
بیردن کؤرپو کیمی
گؤردوم تنهایام،
آرتیق سونا چاتمیش بیر دؤزوم اولدوم،
دۆنیایا الوداع دئین دۆنیایام،
چارمیخا چکیلن من اؤزوم اولدوم.
چوخ باخدیم، بیلمهدیم هئچ بو سیرّ نهدیر،
کؤرپویله — دۆنیادان
کؤچنلر گئدیر!
تورپاغی سمایا جالاماق اۆچون،
توخوندوم گۆنشین محرم الینه.
اؤز کدر کؤرپومو من آتدیم بو گۆن،
دۆنیا ساحیلیندن گؤی ساحیلینه.
قوللاریم اولدوزلا آی آراسیندا،
اؤزوم ده اولدوزام، یوخسا نهیم من!
دئییرم یئر ایله گؤی آراسیندا،
چارمیخا چکیلن بیر کؤرپویم من
سینهم گئنیش یولدور،
بیلمهین بیلسین.
کاش منیم کؤرپومله
گئدنلر گلسین!
۱۹۹۱