تکجه اۆمید قالسین

ایسته‌سن
سۆکوتا بۆرونسون جاهان.
هئچ نه یوخ،
آل مندن گۆلوشلرینی...
آل مندن عؤمرومله
ابدی قالان
او آنی،
او آنی
گؤروشلرینی.

ایسته‌سن، قوی اولسون!
نه دانیش، نه دین!
آل ایندی او عزیز گۆنلری مندن،
ایسته‌سن، بیر صاباح منه وئردیگین
صداقت آندینی
آل گئری، مندن!

ایسته‌سن، آل مندن
دۆشنده کؤلگه،
یاشیل مئشه‌لرین پؽچیلتی‌سینی.
بیزیمچین داریخان
ساحیلله بیرگه،
آل مندن دنیزین پاریلتی‌سینی.

فقط سویوق باخما،
سن گئندن، گؤزل!
سنسیز
گۆنشسیزدیر
بو گؤی، بو تورپاق،
هر شئیی،
هر شئیی،
آل مندن، گؤزل
تکجه اۆمید قالسین
   قوی منده آنجاق.

اۆمید -
بیر دۆنیالیق سۆکوت ایچینده
بیر دۆنیایا دَین
گۆلوشلریندیر.
اۆمید —
بیر شیمشکدیر
بولود ایچینده،
او آنی،
ابدی
گؤروشلریندیر.

۱۹۶۷