تاریخدن گلن سس

"جنّت قؽلینجلارین کؤلگه‌سینده‌دیر"
حضرت-محمّد

قؽلینج اووخارلانیب
   هاچان، هانسی گۆن؟
دؤیوشده سسلنیب،
   سسلنه‌جکدیر.
بلی، جنّتی ده قوروماق اۆچون
دۆشمنه اود ساچان قؽلینج گرکدیر!

آهی عرشه چاتیر
   داغین آرانین،
اما باشیم اۆستده اینام تاجی وار،
جنّت دئدیگیمیز آذربایجانین،
قؽلینجا ان بؤیوک احتیاجی وار.

ساتقینلیق بورا یول
   آچاندان بری،
تورپاق ناله چکدی.
   ائل داردا قالدی.
نه چوخدور ترزی جینگیلتیلری،
قؽلینج جینگیلتی‌سی بس هاردا قالدی؟

داها بلالارا
   دئیک: — الوداع!
قؽلینج قؽغیلجیمی یادی داغلاسین!
غضب قؽلینج کیمی ایتی اولسا دا،
ائل زاغلی قؽلینجی اوجا ساخلاسین!

بیر سؤز عصرلرجه
   مشهور اولوبدور،
قؽلینجی پاس آتان اینسان مغلوبدور!

11 اوکتیابر ۱۹۹۷