سئوگی وادیلرینده

اینسانلار اۆمید — دئیه
   بیردن چؽخیر اۆز-اۆزه،
سئوگی وادیلرینده.
عؤمره ظۆلمت ده چؤکور —
   جان آتارکن گۆندوزه،
سئوگی وادیلرینده.
چمن ایچیر گۆنشی
   قانلی پیاله‌لرله،
قایالاردیر آغلایان
   بۆللور شلاله‌لرله،
سئوگی وادیلرینده.
الوان-الوان نور ساچان
   عطیرلی گۆللر بیتیر،
بال چیچکلر ایچینده
   زهرلی گۆللر بیتیر.
سئوگی وادیلرینده.
حقیقتله یاناشی
   سسلنیر آغ یالان دا،
چؽخیر سنین قارشینا
   هاچا دیللی ایلان دا.
سئوگی وادیلرینده.
دردلی-دردلی ایز سالیر،
   مۆقدّس یولا اینسان،
وۆصالا یئتمه‌سه ده
   یئتیر کمالا اینسان،
سئوگی وادیلرینده.
سحیرلی یول نئجه ده
   سئویملی مؤعجوزه‌دیر،
سونو سونسوز ماویلیک،
   سونو اوجا زیروه‌دیر،
سئوگی وادیلرینده.

15-22 مای ۱۹۹۴