ساکیت سطیرلر

اینسانلار سئویلر،
سئور دۆنیادا،
اۆمیدلر عؤمورچون مغرور قاناددیر.
سئوگی بیر کیچیجیک
قلبه سؽغسا دا،
بلکه سئوگی اؤزو بیر کایناتدیر.

اونون اۆفوقلری
او قدر درین،
اونون آرزولاری کؤنول واریدیر،
بلکه او شفقلی، نورلو گؤزلرین
همین کایناتین
اولدوزلاریدیر.

اۆرگه باغلانان
جؽغیردا، ایزده،
تاپار آهنگینی عؤمرون ایقلیمی.
هر تزه دویغونو
اؤز قلبیمیزده،
آچیریق تزه بیر پلانئت کیمی،

کئچریک اۆمیدله
یول آچا-آچا،
گؤزلریک ان نورلو
صاباحیمیزی.
دۆنیانین محبّت سارایینداجا،
طالع اؤزو کسیب نیکاحیمیزی...

آلار قوجاغینا
باهار-یاز منی،
منی سنین عشقین
قانادلاندیرار.
تروپیک ایستی ده یاندیرماز منی،
سنین
سویوقلوغون
منی یاندیریر.

***

آرزوموز دوغولور
آیدین سحرله،
اوخشاری چاغلایان چایلارلا اولور.
بیزیم گؤروشوموز
دقیقه‌لرله،
بیزیم آیریلیقسا آیلارلا اولور.

سن گۆنش،
من ایسه باشی قارلی داغ،
سینیر شیمشکلردن
گؤی چیلیک-چیلیک.
بیز کی، بیر-بیریندن
اوزاق دا اولساق،
بیز کی، بیر-بیریندن
آیری دئییلیک.

***

گؤروشدوک،
دالغالار آخدی ساحیله...
دینله‌دین،
دانیشدیم آرام-آرام من.
دئدیم کی، خوشبختم،
چۆنکی سنینله .
عینی بیر کۆچه‌دن آددیملارام من.

ایل کئچدی،
دالغالار دیدی ساحیله...
هر سنسیز گۆنومو ایل ساییرام من.
دئییرم: خوشبختم،
چۆنکی سنینله
عینی شهرده‌جه یاشاییرام من.
ایل کئچر...
دالغالار وورار ساحیله...
سانارام عشقینله اوچان قوشام من.
دئیرم خوشبختم،
چۆنکی سنینله
عینی پلانئتده دوغولموشام من.

۱۹۶۷