بورا موغاندیر

ه.کۆرچایلی‌یا ایتحاف
چمنلر یام‌یاشیل، دره‌لر گؤزل،
ائله بیل دۆنیادا هر یئردن اوّل،
سحر بورا گلیر الینده مشعل،
بورا ظۆلمت بوغان، گۆنش دوغاندیر،
بورا موغاندیر!

زحمتله یوغرولموش اونون مایاسی،
مین عصرین عشقیدیر سؤزو، معناسی.
آغ-آغ تایالاردیر داغی، قایاسی،
سونسوز زمیلری درین عۆمّاندیر،
بورا موغاندیر!

اونون ایلک آرزوسو، مورادی کۆردور،
او، بیر قارتالدیرسا، قانادی کۆردور.
اونون آناسی کۆر، اؤولادی کۆردور.
او، هم غضبلیدیر، هم مهریباندیر،
بورا موغاندیر!

دوغور قؽش سحری، سوسور چؤل-باییر،
باهارین اؤزو ده بوردا قؽشلاییر...
دۆنیانین قوشلاری اونو خوشلاییر،
مین ائلدن گلنه بیر آشییاندیر،
بورا موغاندیر!

بوردا جوشغون کئچن هر اینسان عؤمرو،
آندیریر خزره تؤکولن کۆرو.
اوباشدان دۆزلره یاییلان سۆرو،
ائله بیل داغلارا قالخان دوماندیر،
بورا موغاندیر!

یاغدیقجا دۆزلره نور قوجاق-قوجاق،
او گؤزو دومانلی جئیرانا بیر باخ،
هانسی شاعیریسه خاطیرلایاراق:
"منی بیر ده یازین..." دئییر هاچاندیر.
بورا موغاندیر!

حیات اونا وئریب بۆتون رنگینی،
سؤیودلو چایلارین ایلک آهنگینی.
چمنین سونسوزو، گؤیون انگینی،
اونا طبیعتدن بیر ارمغاندیر،
بورا موغاندیر!

خوش اولار اۆرگین عۆمّانی وارسا،
سئوینجی، کدری دویانی وارسا...
کیمین موغان بویدا موغانی وارسا،
دئسین کی، صحرا یوخ، او بیر جاهاندیر،
آدی موغاندیر!

۱۹۵۹