کیمده آرزو سونسوزدور،
کیمده آرزو ایلغیمی.
کیمه باهار ابدی،
کیمهسه قؽش ایقلیمی.
کیمده اۆمید آتشی،
کیمده اۆمید ذرّهسی،
کیمده اینام گۆنشی،
کیمده اینام شؤعلهسی.
کیمیسی شربت ایچیر،
کیمیسی زهر اودور.
کیمه میلیون دا آزدیر،
کیمهسه مین ده چوخدور.
کیم نفسینین نؤکری —
کاسیبلارین آغاسی،
کیمین یاسی دۆنندی،
کیمین بو گۆندور یاسی.
کیمسه آلتون سارایدا،
کیمسه اوچوق داخمادا.
کیمین گؤزو دویماییر،
کیمه بسدیر لوخما دا.
کیمده تۆلکو حیلهسی،
کیمده آسلان قۆّهسی،
تۆلکویه رۆتبه دۆشور،
آسلانا قورد قفسی.
کیمده عدالت سؤزو،
کیمده عدالت اؤزو،
دۆنیا نئجه دۆنیادیر؟
کیمه گۆنشلی گۆندوز،
کیمه گئجه دۆنیادیر!
من بیلمیرم نیه سن
سؤیله، بئلهسن دۆنیا؟
منیمله اؤز سیرّینی
بلکه، بؤلهسن، دۆنیا؟
...بو آن دۆنیا سۆکوتو —
هئچ ده سۆکوت دئییلدی
ساندیم مین-مین سیرّ منه،
پیچیلتییلا دئییلدی
1 یانوار ۲۰۰۰