آت، اؤولاد و تورپاق

(خالق روایتی)
   بو روایتی منه دانیشمیش مۆدریک عالیم
   دوستوم میرعلی سئییدووا میّنتدارام

خیال اوزاق-اوزاق
   ایللره واردی،
چاپارلار یوللاردا
   دومان قوپاردی.
چاتدی حؤکمداردان
   خاقانا خبر:
— گؤزل آغ آتینی
   سن منه گؤندر!
"آغ آتی وئرکمی؟
   آت کی، قاناددیر".
گلدی مصلحته
   ائل دسته-دسته.
خاقان چوخ دۆشوندو،
   او، غمه باتدی.
دئدی: قان دۆشمه‌سین
   بیر آتین اۆستده.
ایل کئچدی...
بولودلار
   داغلاری ساردی،
چاپارلار یوللاردا
   دومان قوپاردی.
چاتدی حؤکمداردان
   خاقانا خبر:
— اورتانجیل اوغلونو
   سن منه گؤندر!
منیم قوشونومدا
   عسگرلیک ائتسین،
یوخ، یوخ آغ آتیما
   مهترلیک ائتسین.
"اؤولاددان ال چکک؟
   اؤولاد موراددیر!"
گلدی مصلحته
   ائل دسته-دسته.
خاقان چوخ دۆشوندو،
   او، غمه باتدی.
دئدی: قان دۆشمه‌سین
   بیر اوغول اۆستده!
دۆنیایا نور ساچان
   ائرکن باهاردی،
چاپارلار یوللاردا
   دومان قوپاردی:
— داها دارلیق ائدیر
   بوردا یئر منه.
قونشو تورپاقلاری
   خاقان، وئر منه!
"یادلار حاکیم اولسون
   یوردوندا سنین؟"
گلدی مصلحته
   ائل دسته-دسته.
— وئجسیز تورپاقلاردیر
   قوی وئرک گئتسین،
کول-کوس دا بیتمه‌ییر
   او شوران دۆزده.
واخت کئچدی، —
   سۆکوتلو دقیقه‌لرله
خاقان اؤز یئریندن
   قالخدی کدرله:
— آغ آتی وئردیم کی،
   من آت تاپارام،
اؤولادی وئردیم کی،
   اؤولاد تاپارام.
من تورپاق تاپمارام،
فقط دۆنیادا،
نیه تورپاغیمی
   من وئردیم یادا؟
تورپاق منیم دئییل -
 خالقیندیر تورپاق،
آنجاق عدالتین،
حاقیندیر تورپاق.
بابامدان بو تورپاق
   منه میراثدیر،
بو تورپاق اۆستونده
   اؤلسم ده آزدیر.
گل، دۆشمن،
   یاسینی گؤره‌جک عالم،
سنه اؤزون بویدا
   تورپاق وئررم!
چاپارلار هؤولنک گئری چاپدیلار.
...یادلار بو تورپاقدا
   قبیر تاپدیلار.

۱۹۸۸