I
— دنیزی هدیّه وئریرم سنه...
من دئدیم، سن باخدین، سن گۆلومسهدین.
گؤیلرین شفقی دۆشدو اۆزونه.
— من ایسه... گؤیلری وئریرم، — دئدین...
آیریلدیق غریبه هدیّهلرله،
گؤیلر عشقیم کیمی منه عزیزدیر.
آیریلدیق دنیزله، آغ لپهلرله،
نئجه آپاراسان؟ دنیز دنیزدیر.
دنیزی وئردیم کی، سنه هدیّه،
گلدیگیم ساحیله گلهسن بیر ده.
منی گؤرمهینده او منم - دئیه،
منیمله دانیشیب، گۆلهسن بیر ده.
— اگر گؤروشمهسک، بیزه داغ اولار،
دئدیم، نئچه دفعه بئله دئدیم من.
دنیز ساحیلینه قاییتماق اولار،
گؤیلرین ساحیلی وارمی، گئدیم من؟!
دۆشوندوم، آیریلیق گلندن بری،
سن منیم عشقیمه چؽراق اولاسان.
اونونچون وئردینمی منه گؤیلری،
مندن گؤیلر قدر اوزاق اولاسان؟!
II
من بیر دنیزم کی، عشقیم سحردیر،
سنی دۆشونورم، عزیزیم، یئنه.
منیم دالغالاریم خاطیرهلردیر،
قوی چاتسین قلبینین
ساحیللرینه.
اصل محبّت کی، بؤیوک هۆنردیر،
جوشار عۆمّان کیمی تزه آرزولار.
منیم دالغالاریم
خاطیرهلردیر،
اوردا توفان دا وار، بورولغان دا وار.
دنیزم، عشقیمدن قاچماق هدردیر،
من کی، آدلاییرام چؤلو، چمنی.
منیم دالغالاریم،
خاطیرهلردیر،
گئجه ده، گۆندوز ده تاپاجاق سنی.
III
ایستهسن یوخونا گلرم سنین،
گلرم دنیز کیمی.
اۆزونه اینجیلر چیلرم سنین،
چیلرم دنیز کیمی.
یولونا شفقلر سپرم هردن،
سپرم دنیز کیمی.
ایستهسن اۆزوندن اؤپرم هردن،
اؤپرم دنیز کیمی.
آدینی قلبیمین ساحیللرینه،
یازارام دنیز کیمی،
"سئویرم" سؤیلهسن بیر آخشام منه،
سوسارام دنیز کیمی،
سوسارام دنیز کیمی.
IV
دۆنیادا ساکیتلیک آرامادیم من،
گۆنش کیمی پارلا،
سحر کیمی گل.
گؤیلرتک یوخوما گلمک ایستهسن،
سن آیلی، اولدوزلو گؤیلر کیمی گل.
آدلا قوجاغیندان گور توفانلارین،
من باخیم آخشامدان سحره کیمی.
آدلا آغ یولویلا کهکشانلارین،
پارلاسین هر اولدوز خاطیره کیمی.
گل، قؽش گئجهسینده،
یاز سحرینده،
دنیزی گؤیلردن آییرماق اولماز!
سونسوز کایناتین اۆفوقلرینده،
سن گؤروش واختینی شیمشکلرله یاز!
من گرک نغمهتک سنی دینلهیم،
سن منیم عشقیمله، اۆرگیملهسن.
نه قدر گؤیلر وار، من سنینلهیم،
نه قدر دنیز وار، سن منیملهسن.
۱۹۶۳