سن گلدین،
ظۆلمتدن گۆن چؽخدی بیردن،
نه قدر اعجازکار گؤروندو جاهان؟
سنی گؤزلهمیشدیم عؤمروم بویو من،
سؤیله، بس هاردایدین سن بو واختاجان؟
کئچیب گؤی درهنی،
یاشیل چمنی،
ائله یاخین گلدین، ائله اوزاقدان!
بلکه مین ایل اوّل گؤرموشدوم سنی،
سرین سو ایچنده سن بوز بولاقدان!
ائله بیل اۆزلشدیم
الهی سیرله،
بو نه مؤعجوزهدیر، بو نه حئیرتدیر؟!
محبّت اؤلچولمور ایلله، عصرله،
محبّت اؤلچوسو ابدیتدیر.
زؤهره اولدوزو تک
یانیب اوباشدان،
اۆفوقلر آشیردین خیاللاریمدا.
سن هله دۆنیایا گؤز آچمامیشدان،
کۆسوب-باریشیردین خیاللاریمدا.
سن گلدین عؤمرومون
قارلی قؽشیندا،
روحومدا ائهتیراس، اۆرگیمده غم.
جنّت قاپیسینین ائلچی داشیندا،
حاضیردیم مین ایل ده سنی گؤزلهیم.
او نهیدی؟
ظۆلمتدن گۆن چؽخدی بیردن،
نه قدر اعجازکار گؤروندو جاهان!
سنی آختاریردیم عؤمروم بویو من،
سؤیله بس هاردایدین سن بو واختاجان؟
۱۹۹۸