(افسانه)
وزیر قاشقاباقلی ایچری گیردی،
خالچایا دؤشنیب او سلام وئردی.
— نه دئمک ایسترسن، ای صادق اینسان،
سؤیله نه اولوب کی، هیجانلیسان؟
— شاعیرلر شاعیری دئدینیز اونا،
گرک لایق اولسون شاهلار شاهینا،
شاعیرلر شاعیری... قیبلهیی عالم،
والله هئچ بیلمیرم — من نئجه دئیم...
سیز وورون بوینومو وارسا، گۆناهیم
یئرلر سیزینکیدیر، گؤیلر اللهین.
اللهدان یازیر، او، شاهی اونودور.
اللهی او سیزدن یوخاری توتور.
... زر تاختین اۆستونده شاه قورجالاندی،
ائله بیل گؤزلری قؽرمیزی قاندی.
— یؽغیر دؤورهسینه او جاوانلاری،
وصف ائدیر آیلاری، آسیمانلاری.
دۆزدور اللهی دا اونوتماق اولماز،
شاهی الهییه تای توتماق اولماز!
— او بؤیوک بلایمیش، بیلمهمیشم من.
منیم یاخشیلیغیم گلسین گؤزوندن.
— من نئجه سؤیلهییم والله عاییبدیر.
دئیهسن او بوردا هارینلاییبدیر.
اونو دینلهمهیه ائل-ائلات گلیر.
مگر بونلار سیزه ظارافات گلیر؟
سیزین امرینیزله قیبلهی-عالم،
من دارا چکیلسم شرف بیلرم.
— بلکه بیردفعهلیک بوینو وورولسون!
یوخ، وحشی صحرایا صاباح قووولسون!
قوی گئدیب قورد-قوشا اوردا یئم اولسون!
راحات نفس آلدی وزیر بو آندا.
نور سؤندو سارایین اوتاقلاریندا.
... شاعیرلر شاعیری باتیب قان-تره
اۆز توتدو آلوولو، اودلو چؤللره.
وحشی حئیوانلارا او مهمان اولدو،
حئیوانلار اینساندان مهریبان اولدو.
آخدی اۆرگیندن سؤز میصراع-میصراع،
دؤندو ماغارادا داش یازیلارا.
یادیگار قالماقچین بۆتون بشره!
آیلارا، ایللره و نسیللره!
... بیر گۆنسه بیر خبر چاتدی صحرایا،
پادیشاه الوداع دئدی دۆنیایا.
شاعیرسه قلبینده ایللرین دردی،
شاهین قبری اۆستده فاتیحه وئردی.
او، بیر چینار اکدی مزار یانیندا،
گتیریب سو تؤکدو اوووجلاریندا.
... بیر گۆن توفان قوپدو، دهشتلی توفان
قوملار دریاسیندا چالخاندی جاهان.
شاه قبری قوملارین آلتیندا باتدی،
— چینارسا، اوجالیب گؤیلره چاتدی.
شاعیر اۆرگینین عدالت سؤزو،
جالادی ایشیغا قارا گۆندوزو:
"یا اللهیم،
اؤلوم اونودولسا دا،
ظۆلوم اونودولمور اصلا دۆنیادا"
دییشیر دؤرانلار،
اؤتور زامانلار،
چینار سجدهسینه گلیر اینسانلار!
6 آپرئل ۲۰۰۰