یاز گۆنو - نووروز گۆنو

بو گۆن، یاشید اولور گۆندوزله گئجه،
داغا دومان چؤکوب، چن یئریدیکجه،
درین دره‌لرده سئل داشان گۆندور.
اوجا زیروه‌لرده
قار اریدیکجه،
داملالار دریایا قاریشان گۆندور.
بو گۆن یئرین، گؤیون اؤز سئوینجی وار،
گؤزونو آچدیقجا گۆنشلی باهار،
گؤزلر شفقلردن قاماشان گۆندور،
اوزاق اۆفوقده‌کی سویوق اولدوزلار
بو گۆن ایستی-ایستی سایریشان گۆندور.

گلین، سلاملایاق دوغما باهاری.
آنا یوردوموزون
آنا قوللاری.
باهارین بوینونا ساریشان گۆندور.
اودلار تورپاغی‌نین گور تونقاللاری
یئرین اۆرگی‌تک آلیشان گۆندور.

چایلار آرزو کیمی آشیب-داشاندا،
حسرتلی تورپاقلا یاز قوووشاندا،
یئر گؤیه،
گؤی یئره
یاراشان گۆندور.
طبیعت سئوگیدن صؤحبت آچاندا،
کۆسموش سئوگیلیلر باریشان گۆندور.
دورنالار وطنه دؤنور غۆربتدن،
اۆفوقلرین دونو ماوی خلعتدن،
کؤکسونده گۆنشی
زر نیشان گۆندور.
بو گۆندن، صاباحدان، ابدیتدن
مهریبان-مهریبان دانیشان گۆندور.

۱۹۶۷