او گۆندن

سئیر ائله،
سیرلیدیر
   داغلار بو گۆن ده.
داغلاردا بیر قارا
   ماغارا دورور.
یازدا دا، قؽشدا دا
   اونون اۆستونده،
بولودلار آغارا-آغارا دورور.
سن کئچیب زامانین
   سرت گردیشیندن،
گؤز آچدین بشرین
   اوغلان یاشیندا.
بیر آنا قلبی‌نین
   اودلو عشقیندن،
دوغولدون بیر یانار
   تونقال باشیندا.
توخوندو ایلک دفعه
   گؤزلره اودلار،
سانکی چیچک سپدی
   اۆزلره اودلار.
سیرلی نیدا گلدی
   گؤی قاتلاریندان،
آیین شفقینده یودولار سنی.
زۆمرود چمنلرین
   گؤی اوتلاریندان،
بیر یومشاق بلَگه
   توتدولار سنی.
یئرده قؽغیلجیملار،
   گؤیده اولدوزلار،
سانکی بیر-بیرینه
   دَیدی اولدوزلار.
امدی تر دوداقلار
   آنا دؤشوندن،
بیاض سۆد سئللری آخدی جاهاندا.
اؤز حیات سسینله
   قؽشقیراندا سن،
یوخودان گئجه‌نین
   اؤزو اویاندی.
سنه لایلا دئدی
   مهریبان آنا.
گؤزونده شفقی
   آتشین، اودون.
گلیب کئشمکئشلی
   دۆنیا قوینونا،
او گئجه اودلارلا
   قوشا اویودون.
دۆشدو قایالارا
   بیر قارا کؤلگه،
سنین باشین اۆستده
   ایلدیریم چاخدی.
او گۆندن قلبینده
   آل قانلا بیرگه،
آلوولار چاغلادی،
   آتشلر آخدی.
پارلاییب آتشلی
   احتیراص کیمی،
آلوولو توفانلار
   قوپاران اولدون.
او گۆندن آتشی
   بیر میراث کیمی
عصردن عصره
   آپاران اولدون.

۱۹۸۷-۱۹۸۸