مؤعجوزه باش وئریب یئر کۆرهسینده،
منیم خیال آدلی مملکتیم وار.
مۆقدّس روحلارین ایحاطهسینده،
بو گئجه مۆقدّس همصؤحبتیم وار.
الهی سس گلیر قدیم گنجهدن،
نیظامی گؤرونور — عصا الینده.
او، اولو بابامیز اینجیکدیر دئین،
تاپمادیق شعرینی آنا دیلینده.
نسیمی یاناشیر... او، مۆدریک، ندیم!
سسینده غۆرور وار، واردیر غضب ده.
دئیهسن اعداما بیر آن گئجیکدیم،
منی آسایدیلار گرک حلبده.
خطایی شؤهرتی گزیر دۆنیادا —
تۆرکون تۆرکه قؽلینج چالماسی، هئیهات!
شاعیر گۆشهنیشین اگر اولسا دا،
شاهین گۆشهنیشین اولماسی، هئیهات
او، دئییر: آدیمیز عرشه بللیدیر،
آنا دیلیمیز ده نور تمللیدیر.
فۆضولی — او، مغرور سؤز گۆنشیندن،
چمنلر قؽزاریر لالهلرییله.
اودلو کؤینک گئییب عشق آتشیندن
نئی تک اۆرک یاخیر نالهلریله:
— نه قدر سؤز آرا، نه قدر سؤز گؤز،
اصیل صنعتکاری دؤران ایستهمز!
سئویملی وورغونون روحویلا بیرگه،
واقیف آغ یوللارا سالیر آغ کؤلگه.
قایادان آتیرلار،
قارتالا دؤنور،
بیزیم قلبیمیزه اوچوب او قونور،
پؽچیلداییر: دوغرو حالت گؤرمهدیم،
ایری گؤردوم، اؤزگه بابت گؤرمهدیم!
صابیر غضبلیدیر... او اولو اینسان!
قانا سوسادیقجا الی-قانلیلار،
اونون هاراییندان تیترهییر جاهان:
— والله، مۆسلمانام، آ شیروانلیلار!
من گؤیده توتورام طعنه داشینی،
گرک کی، نادانین ازیم باشینی!
خؽزی وادیسیله دومان سۆرونور،
بیر ده گؤروشریک، الله کریمدیر
داغدان داغ وۆقارلی بیر جاوان ائنیر —
بو گۆن او، یۆز یاشلیم، او جعفریمدیر!
دئییر: -یارا دَیدی وطن کؤکسونه،
آتان کازاکلاردیر، بیلیرم یئنه!
سیبیر شاختاسیندان،
قورتولماق اۆچون،
جاوید مرد اوغوللار چیینینده گلیر.
بؤیوک قارداشییلا گؤروشه بو گۆن،
مۆشفیق گمی ایله نارگیندن گلیر.
— اوغلوم، نه واختدی کی، سنی گزیردیم.
— اوستادیم، خوشباختام، من سنی گؤردوم!
مۆقدّس مجلیسه قوناق دۆشرکن،
حتی یاددان چؽخدی، اؤز آدیم، الله!
دوغما داهیلرله من گؤروشرکن،
الهی بیر گئجه یاشادیم، الله
...تانریم، بو یوخویدو، یا حقیقتدی؟
ائله دۆشوندوم کی، سونسوز هارایام!
بیردن اۆشوتمهلر گزدی جانیمدا،
گئجهیله گلنلر، گئجهیله گئتدی،
منیم یئللر اسن خانیمانیمدا،
دهشتله دۆیدوم کی، یئنه تنهایام...
گۆنشین پریشان نورو ساچیلدی...
آیریلیق سحری، نیه آچیلدین؟
۲۳ یانوار ۲۰۰۰