آسیمان آلتیندا، تورپاق اۆستونده

قالین بولودلاردان
چؽخدی داغ، قایا،
اریدی دومان دا
تورپاق اۆستونده.
بیر اینسان آرزوسو
گلدی دۆنیایا،
آسیمان آلتیندا،
تورپاق اۆستونده.
او نئجه نغمه‌یدی
آخدی جاهانا،
ایلک لایلا دیللندی
تورپاق اۆستونده،
یئر ایدی، گؤی ایدی، —
گۆنشدی آنا،
اینسان "آنا" دئدی —
تورپاق اۆستونده.
پارلادی یولوندا
لاله-چیراقلار،
اینسان باخدی یئنه
تورپاق اۆستونده.
قایادان قاینایان
شفّاف بولاقلار،
هوپدو اۆرگینه
تورپاق اۆستونده.
بوردا اؤز سؤزونو
نغمه‌یله دئیر،
قلبلری آچ، دیندیر، —
تورپاق اۆستونده.
ماوی گؤیلره‌سه
قویما، گؤز دیَر -
گؤیلر شۆشه‌دندیر
تورپاق اۆستونده.
"من گلنده گؤی ایدی،
قاراباغین سؤیودو".
منیم تورپاغیمدیر -
منیم تورپاغیم.
اینسان سؤنمز نوردور
تورپاق اۆستونده.
— قارا باغلاماسین
قوی قاراباغیم،
غۆرورلا او دوردو
تورپاق اۆستونده.
وطن طالعینی
یازیردی اینسان،
تورپاقدی وار-یوخو
تورپاق اۆستونده.
هر گۆن اؤلومه ده
حاضیردی اینسان،
بیر گۆن دوغولدوغو
تورپاق اۆستونده.
بشر آددیمی‌یلا
یول آلیب گئدیر،
تاریخ ده، زامان دا
تورپاق اۆستونده.
وطن اینسانلیغین
ایلک طالعیدیر
آسیمان آلتیندا،
تورپاق اۆستونده.

۱۹۸۸