قلبیمده سلام وار آنا خزردن
تۆرکیهدهکی ائلازیغ شهرینین یاخینلیغینداکی
خزر گؤلونه مۆراجیعت
یول آلیب ان قدیم قرینهلردن
گلدیم بابالارین دوغما ائلینه.
قلبیمده سلام وار آنا خزردن -
خزرین اؤولادی خزر گؤلونه!
کئچدی کاروان-کاروان ارلر، ارنلر
یوللاردا آچدیلار مین-مین سحری.
وطندن - وطنه کؤچوب گلنلر
اؤزویله گتیردی دوغما خزری.
نسیللر بو یئرده
خزرلی اولدو،
خزر آغیر گۆنده
تسلّی اولدو.
بوردا ال-اۆزومو یودوم بیر سحر،
سولار خزر کیمی گؤردوم دوز دادیر.
گؤللر شیرین اولور، دۆنیادا گؤللر،
بونون شیرینلیگی دوغمالیقدادیر.
هاچان نورلو آخشام یئرلره دۆشور،
آیین صاف نوروندا آلیشیر خزر.
پارلاق اولدوزلاردا گؤزلر گؤروشور،
خزر اؤولادییلا دانیشیر خزر:
— نئجهسن؟
— یاخشییام!
— یاخشی اول، بالا!
یئللر سندن گلن خئییر خبردیر.
— سن سونسوز دریاسان، من کیچیک داملا
— خزر داملاسی دا خزر قدردیر.
دوغمادیر گؤی دۆزلر،
شیش قایالار دا،
دیللنیر گور چایلار محرم سؤزویله.
تک خزری کۆلگی چاتمیردی بوردا
اونو دا گتیردی خزری اؤزویله.
۲۱ مای ۱۹۹۶