دۆننده قالدی

گؤرن هارا اوچدو
   شاقراق گۆلوشلر،
اۆمیدلر خیالا دؤننده قالدی؟
تیترک هیجانلار،
   دوغما گؤروشلر
الیم یئتیشمه‌ین دۆننده قالدی.

ایلکین محبّتین
اودو، آتشی،
عشقیم بیر اۆرکده سؤننده قالدی؟
نه تئز غۆروب ائتدی سئوگی گۆنشی،
نورو، حرارتی دۆننده قالدی.

طبیعت! نه بؤیوک سحیرلرین وار،
نه وئردینسه یئنه او سنده قالدی،
وئرنده نجیبسن،
آلاندا قدّار،
دئین سخاوت ده دۆننده قالدی.

ایللر کمند ایمیش
اینسان بوینوندا
عؤمرو دارا چکمک کمنده قالدی؟
زامانین آمانسیز، نامرد اوینوندا،
نه واردی، نه یوخدو دۆننده قالدی.

نولدو دۆزه دۆشن
او قوشا ایزلر،
اوت باسدی، سارالمیش چمنده قالدی.
گؤزلر عئینکلردن مرحمت گؤزلر،
گؤزلرین شؤوقو ده دۆننده قالدی.
یاتیردین، اویاندین
بلکه سن، شاعیر
ایللرین اوخلاری سینه‌نده قالدی،
بو گۆنه کئچدینمی گؤره‌سن، شاعیر،
بلکه بو گۆنون ده دۆننده قالدی؟

20 سئنتیابر ۱۹۹۶