کاش یئر ساکیتلشه،
گؤی رحمه گله،
گؤر نئجه چاغلاییر عؤمور دنیزی!
اوّل توفان قوپار،
سونرا زلزله
الله زلزلهدن ساخلاسین بیزی.
ای اینسان!
اۆفوقدن چکیلسین بولود،
قوی گۆنش پارلاسین، یوللارا چؽخسان.
آت شاهه قالخاندا
جیلووو برک توت،
جیلووو بوراخدین، یؽخیلاجاقسان!
خوش کلام آردیندا
حقیقت هانی؟
اینسان دا یالانی شربت تک اودور.
کیمسه-بۆتونلوکله
آذربایجانی
داناباش کندینه برابر توتور.
رحمتله یاد ائدک،
میرزه جلیلی،
او، یازدی یاندیقجا کؤکسونده اۆرک.
بو گۆن بیز اؤترکن
چتین یۆز ایلی،
وطنی بیر کنده اوخشار بیلمهیک.
تانریم، باغیشلاما،
گۆناه ایشلری،
نه قدر چکیلر سؽناغا اؤلکه؟
چؽخسا هارینلارین
طاماح دیشلری
راحات نفس آلدی میلّتیم بلکه!
عؤمروم اینامیمین
صافلیق سسیدیر،
همیشه حاق سؤزو نادان داشلاییر،
بو گۆن اییلنلر زمانهسیدیر،
یوخسا باغیرانلار عصری باشلاییب؟
کاش یئر ساکیتلشه،
گؤی رحمه گله،
گؤر نئجه چاغلاییر جاهان دنیزی!
اوّل توفان قوپار،
سونرا زلزله،
الله زلزلهدن قوروسون بیزی!
12-19 فئورال ۲۰۰۰