شر قاریشاندا

داغلار دؤنر کؤلگه‌لره،
قاتی ظۆلمت سره-سره،
غریب آخشام چؤکر یئره
ائل دئمیش — شر قاریشاندا.

بولود گئدر، شیمشک چاخار،
آی دا دوروب غملی باخار.
یاغیش کیمی اولدوز یاغار
گؤیلرله یئر قاریشاندا.

آرزو سولار،
   خیال اولار،
ال چاتمایان وۆصال اولار،
محبّتلر سوال اولار
سئوگی‌یه سیر قاریشاندا.

دوغما خزر جوشوب داشار،
دنیزده ده حسرت یاشار.
ایکی ساحیل قوجاقلاشار
آرازلا کۆر قاریشاندا.

من نه دئییم عصره، واختا،
اؤزو محرم، سؤزو ساختا،
شئیطانلار دا چؽخار تاختا
خئییرله شر قاریشاندا.

نبی، اؤیمه سرتلیگینی،
مرد گؤسترر مردلیگینی.
زر ایتیرمز زرلیگینی
تورپاقلا زر قاریشاندا،

26 فئورال ۲۰۰۰