کیم منی خاطیرلاسا،
چؽخاراق ساحیللره،
ماوی خزره باخسین.
چئوریلهرک مین کره،
گؤی لپهلره باخسین.
بیلسین، خزر منیمدیر،
گؤی لپهلر منیمدیر،
کیم منی خاطیرلاسا.
کیم منی خاطیرلاسا،
گلسین بولاق باشینا،
قوشا چیناری گؤرسون.
دولانیب داغ باشینا،
قالخان یوللاری گؤرسون.
جوشسون بولاقلار کیمی،
دایانسین داغلار کیمی،
کیم منی خاطیرلاسا.
کیم منی خاطیرلاسا،
اییلیب سحر چاغی
کۆردن، آرازدان ایچسین.
بزننده شاهداغی
درهدن آستا کئچسین،
زیروه بولودلاردادیر،
بیلسین، قلبیم اوردادیر،
کیم منی خاطیرلاسا.
کیم منی خاطیرلاسا،
چوبانلا داغ باشیندا
بارداش قوروب اوتورسون.
قایالارین قاشیندا،
بعضاً ککلیک ده وورسون.
زحمته آلقیش دئسین،
گۆنشه گۆلومسهسین،
کیم منی خاطیرلاسا.
کیم منی خاطیرلاسا،
بیلسین کی، قلبیم وورور.
هله مین دیلهییم وار،
بوردا کئچمیشیم دورور،
بوردا گلهجهییم وار.
گزسین میلی، موغانی،
بۆتون آذربایجانی،
کیم منی خاطیرلاسا.
۱۹۵۹