منو
شهریار اۆچون
قارداشیم نبی‌یه دئیین: خزردن
چوخداندیر خزری‌یله اسمه‌ییر نه‌دن؟
(جنوب ارمغانیندان)
اریییر کپزده،
ساوالاندا قار،
سولار دره‌لری اویادیب گلیر.
پاییزدا جنوبا
گئدن دورنالار،
نووروزدا تزه‌دن قاییدیب گلیر.
گلیر، یئره، گؤیه ایلهام گتیریر،
وطندن وطنه سلام گتیریر.
یوردون سحرینده
گؤزوم وار منیم،
زۆمرود چمنلرده اوت دیزه‌جندیر.
هر ایکی ساحیللی
دۆزوم وار منیم،
منیم آستانامدان تبریزه‌جندیر.
چیچکلر بو یئرین مهریبانیدیر،
وطنین وطنه ارمغانیدیر.
آرازا باخارام،
گؤزلریم دولار،
من ایشیق اومارام، شفقلر سؤنر.
بوردا لپه‌لنیب
قاینایان سولار
چاتیب او ساحیلده دالغایا دؤنر.
او، منیم سئوگیمین گور دالغاسیدیر،
وطنین وطنه نور دالغاسیدیر.
کۆلکلر، بیر سیرلی
حیات کیمیسیز،
آخی، اوردا گؤزلر اۆرکلر منی
کۆلکلر آچیلان
قاناد کیمی سیز،
او یئره آپارین، کۆلکلر، منی.
کۆلکلر — اۆرکلر نیداسی کیمی،
وطنین وطنه صداسی کیمی.