"سو کیچیگین، یول بؤیوگوندور"
(آتالار سؤزو)
کیچیکلر بؤیوگه سجده قؽلماسا،
نئجه دار یوللاردان کئچیله بیلر؟
ایر کیچیکلری سایه سالماسا،
ائله بؤیوکلر ده کیچیله بیلر.
کیچیگین چیینینده ان آغیر یۆکلر
او دا کی، یورولماز نه گۆندوز، گئجه
زامان تارلاسیندا گرک بؤیوکلر
مهریبانلیق اکیب، محبّت بیچه.
یاتیر قهرمانلیق مهریبانلیقدا،
بؤیوک رحیم ده وار قهرمانلیقدا.
لایق یئر آییریب
طالع هر کسه.
هامی آت چاپمیر کی، قؽزیل یهرده؟
بؤیوک اؤز یئرینی اگر بیلمهسه،
بعضاً کیچیک اونو اۆستهلهییر ده.
کئچیر کۆلک کیمی
ایل دالینجا ایل.
بشر یووا تیکیر آراندا، داغدا.
آخی کیچیک اولماق کیچیکلیک دئییل،
بؤیوکلوک دئییلدیر بؤیوک اولماق دا.
تکبّور ظۆلمتدیر،
سادهلیک چؽراق.
طالعجه دوغمادیر بؤیوکله کیچیک.
حاقین شفقیله ایشیقلاناراق
اصیلزادهلیکدیر اصیل سادهلیک.
کیچیگه سو وئرین،
هوسله ایچسین.
آچاجاق آرزوسو گۆل-چیچک صاباح،
بؤیوگه یول وئرین،
غۆرورلا کئچسین،
بو یولدان کیچیک ده کئچهجک صاباح.
10 مای - 1 ایون ۱۹۹۷