میرواری سویو

دۆنیا زینتی‌نین
بیزیک واریثی،
نه‌لر یاشامادیق
بیز عؤمور بویو.
گؤرموشدوک حیاتدا
سو میرواری‌سی،
بو گۆن هاردان چؽخدی
میرواری سویو؟

دن-دن میرواریلر
   بویونلار بزر،
نئچین میرواری‌یه
   توتولدو گؤزلر؟

من نه اوکئاندیم،
نه ده عۆمّاندیم،
کی، میرواری چؽخسین
لپه‌لریمدن!
من بو میروارینی
اؤزوم قازاندیم،
گؤزومده گؤزوم تک
عزیزلرم منی

سویوق بیر دوماندیر
دؤولتیم، واریم،
داغدا دا اونون تک
سیس — دومان اولماز.
ائله میرواریدیر
منیم میرواریم،
اوندان بخشیش اولماز،
ارمغان اولماز!

گئدیر کاروان ایللر
غم چکه-چکه،
اوزاق خیاللاردا
یار-یاراشیق وار.
گؤرمه‌مک گؤرمکدن
یاخشیدیر بلکه،
بلکه کورلوقدا دا
پارلاق ایشیق وار؟

چؤکه‌جک دۆنیایا
بیر ظۆلمتلی سیرّ،
کاش قیسمت اولماسین
بو درد هئچ کسه!
دئییرلر گؤز گؤرور،
کؤنول ده سئویر،
نئجه سئوه‌جگم
گؤزوم گؤرمه‌سه؟

17 آپرئل ۱۹۹۹